ଦେବଗଡ଼ ଜିଲ୍ଲା ରିଆମାଳ ଥାନା କଂସର ଫାଣ୍ଡି ଅନ୍ତର୍ଗତ ଖଳିନାଳୀ ଗ୍ରାମରେ ଆଜି ସନ୍ଧ୍ୟାରେ ବୀଭତ୍ସ ହତ୍ୟାକାଣ୍ଡ ଘଟିଛି। ଘରୁ ଡାକି ଆଣି ଜଣେ ଯୁବତୀଙ୍କୁ ଟାଙ୍ଗିଆରେ ହାଣି ହତ୍ୟା କରାଯାଇଛି । ମୃତକ ଗ୍ରାମର ଯୁଗଳ କିଶୋର ବେହେରାଙ୍କ ଝିଅ ସ୍ବିଟି ବେହେରା (୧୯) | ଖବର ପାଇ ଫାଣ୍ଡି ଅଧିକାରୀ ବିଜୟ ସୂର୍ଣ୍ଣ ଶବ ଜବତ କରି ତଦନ୍ତ ଜାରି ରଖିଛନ୍ତି । ଏହି ମାମଲାରେ ଅଭିଯୁକ୍ତ ଓମପ୍ରକାଶ ପ୍ରଧାନ (୨୬) କୁ ପୋଲିସ ଅଟକ ରଖି ପଚରାଉଚୁରା ଜାରି ରଖିଛି ।
ସୂଚନା ଅନୁସାରେ, ବୁଧବାର ସନ୍ଧ୍ୟା ସାଢ଼େ ୬ଟା ସମୟରେ ଗ୍ରାମର ଓମ୍ପ୍ରକାଶ ପ୍ରଧାନ (୨୬) ସ୍ବିଟିଙ୍କ ଘରକୁ ଯାଇ ତାଙ୍କୁ ବାହାରକୁ ଡାକିଥିଲା। ସ୍ବିଟି ବାହାରକୁ ଆସିବା ପରେ କୌଣସି ଘଟଣାକ୍ତ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏଥିରେ ଓମପ୍ରକାଶ ରାଗି ଯାଇ ଏକ ପନିକିରେ ସ୍ବିଟିଙ୍କ ବେକକୁ ହାଣି ଘଟଣାସ୍ଥଳରୁ ଫେରାର ହୋଇ ଯାଇଥିଲା । ଘଟଣାସ୍ଥଳରେ ମ୍ବିଟିଙ୍କ ମୃତ୍ୟୁ ଘଟିଥିଲା | ପରିବାର ଲୋକ ପୁଲିସକୁ ସୂଚନା ଦେବାରୁ ଫାଣ୍ଡି ଅଧିକାରୀ ଟିମ୍ ସହ ପହଞ୍ଚିଥିଲେ । ହତ୍ୟାର କାରଣ ଅସ୍ପଷ୍ଟ ଥିବାବେଳେ ପୁଲିସ ମାମଲା ରୁଜୁ କରି ଅଭିଯୁକ୍ତକୁ ଅଟକ ରଖି ତନାଘନା ଜାରି ରଖିଛି । ଶବ ଉଦ୍ଧାର କରାଯାଇ ବ୍ୟବଚ୍ଛେଦ ପାଇଁ ପଠାଇ ଦିଆଯାଇଛି ।
