ପାଣିପାଗ ବିଭାଗର ପୂର୍ବାନୁମାନ ଆଜି ଓ ଆସନ୍ତା କାଲି (ବୁଧବାର, ଗୁରୁବାର) ଦୁଇଦିନ ରାଜ୍ୟର ଅଧିକାଂଶ ସ୍ଥାନରେ ବର୍ଷା ସମ୍ଭାବନା ଅଛି। କିଛି ଜିଲ୍ଲାରେ ପ୍ରବଳରୁ ପ୍ରବଳତର ବର୍ଷା ଏବଂ ସ୍ଥାନେ ସ୍ଥାନେ ଅତି ପ୍ରବଳ ବର୍ଷା ଆଶଙ୍କା ଅଛି।
ଗତ ୨୪ ଘଣ୍ଟା ଭିତରେ ରାଜ୍ୟର ବହୁ ସ୍ଥାନରେ ମଧ୍ୟମରୁ ପ୍ରବଳ ବର୍ଷା ହୋଇଛି। ପାଣିପାଗ ବିଭାଗର ପୂର୍ବାନୁମାନ ହେଲା ଆଜି ୧୮ ତାରିଖ (ବୁଧବାର) ରାଜ୍ୟର ଅଧିକାଂଶ ଜାଗାରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି। ମୟୂରଭଞ୍ଜର ସ୍ଥାନେ ସ୍ଥାନେ ପ୍ରବଳରୁ ଅତି ପ୍ରବଳ ଓ କେନ୍ଦୁଝର, ସୁନ୍ଦରଗଡ଼, ସମ୍ବଲପୁର, ବାଲେଶ୍ୱର, ଭଦ୍ରକ ଓ ଯାଜପୁରରେ ପ୍ରବଳରୁ ପ୍ରବଳତର ବର୍ଷା ହୋଇପାରେ । ଝାରସୁଗୁଡ଼ା, ଦେବଗଡ଼, ଢେଙ୍କାନାଳ, ଅନୁଗୁଳ, ବରଗଡ଼, ସୋନପୁର, ବୌଦ୍ଧରେ ପ୍ରବଳ ବର୍ଷା ସମ୍ଭାବନା ଅଛି । ଆସନ୍ତା କାଲି ୧୯ ତାରିଖ (ଗୁରୁବାର) ଅଧିକାଂଶ ସ୍ଥାନରେ ବର୍ଷା ହେବା ସହ ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର ଜିଲ୍ଲାର ଗୋଟିଏ ଦୁଇଟି ସ୍ଥାନରେ ପ୍ରବଳରୁ ପ୍ରବଳତର ବର୍ଷା ହୋଇପାରେ। ବରଗଡ଼, ସୋନପୁର, ଦେବଗଡ଼, କେନ୍ଦୁଝର, ମୟୂରଭଞ୍ଜ, ଢେଙ୍କାନାଳ, ଅନୁଗୁଳ, ବୌଦ୍ଧ ଜିଲ୍ଲାରେ ପ୍ରବଳ ବର୍ଷା ସମ୍ଭାବନା ଅଛି। ୨୦ରେ ବର୍ଷା ପରିମାଣ କିଛି ମାତ୍ରାରେ କମିବ। ଅନେକ ସ୍ଥାନରେ ହାଲୁକାରୁ ମଧ୍ୟମ ଏବଂ ସୁନ୍ଦରଗଡ଼ର ସ୍ଥାନେ ସ୍ଥାନେ ପ୍ରବଳ ବର୍ଷା ହୋଇପାରେ । ୨୧ରୁ ୨୩ ଯାଏଁ କାଁ ଭାଁ ବର୍ଷା ହେବ। ମୌସୁମୀ ଓଡ଼ିଶାର ବାକି ଥିବା ଅଞ୍ଚଳରେ ପ୍ରବେଶ କରିଥିବା ବେଳେ ରାଜ୍ୟରେ ପାଗ ବଦଳିଛି । ୨୦ ତାରିଖ ପର୍ଯ୍ୟନ୍ତ ରାଜ୍ୟରେ ପ୍ରବଳ ବର୍ଷା ସହ ସ୍ଥାନେ ସ୍ଥାନେ ବଜ୍ରପାତ ଆଶଙ୍କା ଅଧିକ ରହିଛି । ତେଣୁ ସତର୍କ ରହିବାକୁ ଏସଆରସି ପରାମର୍ଶ ଦେଇଛନ୍ତି । ଲଘୁଚାପ ଯୋଗୁ ସମୁଦ୍ର ଅଶାନ୍ତ ଥିବାରୁ ସମୁଦ୍ର ଭିତରକୁ ନଯିବା ପାଇଁ ମତ୍ସ୍ୟଜୀବୀଙ୍କୁ ପରାମର୍ଶ ଦିଆଯାଇଛି ।
ଗତ ୨୪ ଘଣ୍ଟା ଭିତରେ ଦେବଗଡ଼ରେ ୧୩୦ ମିଲିମିଟର, ଯାଜପୁରର ଜେନାପୁରରେ ୯୦ ମିମି, ରାଇରଙ୍ଗପୁରରେ ୯୦, କୁଚିଣ୍ଡାରେ ୯୦, ସୁନ୍ଦରଗଡ଼ର ଗୁରୁଣ୍ଡିଆରେ ୮୦, ବାଲେଶ୍ୱର ଔପଦାରେ ୮୦, ଯାଜପୁର ବ୍ଳକରେ ୮୦, ଝାରସୁଗୁଡ଼ା ବ୍ଲକରେ ୭୦, ସୁକିନ୍ଦାରେ ୭୦, ସୁନ୍ଦରଗଡ଼ର ବାଲିଶଙ୍କରାରେ ୭୦, ଖଇରାରେ ୭୦, ମୟୂରଭଞ୍ଜର ଜାମଦାରେ ୭୦, ଦେବଗଡ଼ର ବାରକୋଟରେ ୭୦, ସୁନ୍ଦରଗଡ଼ର ହେମଗିରିରେ ୬୦, ଚାନ୍ଦବାଲିରେ ୬୦, ଉଦଳାରେ ୬୦, ମୟୂରଭଞ୍ଜର ବିଜତଲାରେ ୬୦, ଲହୁଣିପଡ଼ାରେ ୬୦, କୋରେଇରେ ୬୦, ଭଦ୍ରକ ଆଖୁଆପଦାରେ ୬୦, ସୋରରେ ୬୦, ସମ୍ବଲପୁର ନାକଟିଦେଉଳରେ ୫୦ ମିମି, ସମ୍ବଲପୁରରେ ୫୦.୮ ମିମି ବର୍ଷା ରେକର୍ଡ ହୋଇଥିଲା । କଟକ, ଭୁବନେଶ୍ୱରରେ ବି ମଧ୍ୟମ ବର୍ଷା ହୋଇଥିଲା ।
