CEC ଜ୍ଞାନେଶ କୁମାରଙ୍କୁ ନେଇ ବଢ଼ିଲା ବିବାଦ!
ନିର୍ବାଚନ କମିଶନ ଭିତରେ ୧୪ ଥର ଆପତ୍ତି ଉଠିଥିବା ଦାବି, ହଟାଇବା ପାଇଁ ବିରୋଧୀଙ୍କ ପ୍ରସ୍ତୁତି।
ନୂଆଦିଲ୍ଲୀ 26/9 : ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ନେଇ ଜାତୀୟ ରାଜନୀତିରେ ପୁଣି ଚର୍ଚ୍ଚା ତୀବ୍ର ହୋଇଛି। The Indian Expressର ଏକ ତଦନ୍ତମୂଳକ ରିପୋର୍ଟରେ ନିର୍ବାଚନ କମିଶନର ଏସ୍.ଏସ୍. ସାନ୍ଧୁ ଓ ବିବେକ ଜୋଶୀ ବିଗତ ୧୦ ମାସରେ ଅନେକ ନିଷ୍ପତ୍ତି ଓ ପ୍ରକ୍ରିୟାକୁ ନେଇ ଲିଖିତ ଭାବେ ଆପତ୍ତି ଉଠାଇଥିବା କୁହାଯାଇଛି। ରିପୋର୍ଟ ଅନୁସାରେ, ଏଭଳି ଆପତ୍ତି ଅତି କମରେ ୧୪ ଥର ରେକର୍ଡ ହୋଇଥିଲା।
ଏହି ଆପତ୍ତିଗୁଡ଼ିକର କେନ୍ଦ୍ରରେ ଥିଲା ଭୋଟର ତାଲିକାରେ ନାମ ଯୋଡ଼ିବା, ନାମ ବାଦ ଦେବା, ପୁନଃ ନାମ ସାମିଲ କରିବା, ନୂଆ ଭୋଟର ପଞ୍ଜୀକରଣ ପ୍ରକ୍ରିୟା ଏବଂ ଭୋଟର ଡାଟାବେସ୍ର IT ବ୍ୟବସ୍ଥା। ଦୁଇ ନିର୍ବାଚନ କମିଶନରଙ୍କ କିଛି ଆପତ୍ତିରେ କେତେକ ପଦକ୍ଷେପକୁ ‘ଅନଧିକୃତ’ ଓ ‘ଆଇନସମ୍ମତ ନୁହେଁ’ ବୋଲି ଦର୍ଶାଯାଇଥିବା Indian Express ରିପୋର୍ଟ କହିଛି।
Form-6କୁ ନେଇ ପ୍ରଶ୍ନ
ନୂଆ ଭୋଟର ଭାବେ ପଞ୍ଜୀକରଣ ପାଇଁ ବ୍ୟବହୃତ Form-6ରେ Special Intensive Revision ବା SIR ସହ ଜଡ଼ିତ ପ୍ରଶ୍ନ ଯୋଡ଼ାଯିବାକୁ ନେଇ ମଧ୍ୟ ଆପତ୍ତି ଉଠିଥିବା ରିପୋର୍ଟରେ କୁହାଯାଇଛି।
Indian Express ଅନୁସାରେ, ନିର୍ବାଚନ କମିଶନର ବିବେକ ଜୋଶୀ ପୂର୍ବରୁ ଏହି ପରିବର୍ତ୍ତନର ଆଇନଗତ ଆଧାର ନେଇ ପ୍ରଶ୍ନ ଉଠାଇଥିଲେ ଏବଂ ଏସ୍.ଏସ୍. ସାନ୍ଧୁ ମଧ୍ୟ ଏହାକୁ ନେଇ ଆପତ୍ତି ଜଣାଇଥିବା ଦାବି ହୋଇଛି।
ଭୋଟର ଡାଟାବେସ୍ କେନ୍ଦ୍ରୀକରଣକୁ ନେଇ ଚିନ୍ତା
ଅନ୍ୟ ଏକ ବଡ଼ ପ୍ରଶ୍ନ ହେଉଛି ଭୋଟର ତାଲିକାର IT ବ୍ୟବସ୍ଥା। ରିପୋର୍ଟ ଅନୁସାରେ, ରାଜ୍ୟ ଓ ତଳସ୍ତରର ନିର୍ବାଚନ ଅଧିକାରୀଙ୍କ ଡାଟାବେସ୍ ଆକ୍ସେସ୍କୁ ନେଇ ଦୁଇ କମିଶନର ପ୍ରଶ୍ନ ଉଠାଇଥିଲେ। ଡାଟାବେସ୍ ପରିଚାଳନା ଅଧିକ କେନ୍ଦ୍ରୀକୃତ ହେଉଛି କି ନାହିଁ, ସେନେଇ ମଧ୍ୟ ଚିନ୍ତା ପ୍ରକାଶ ପାଇଥିବା ଦାବି ହୋଇଛି।
ଗୋଆରେ ୯୭ ଭୋଟରଙ୍କ ନାମକୁ ନେଇ ମଧ୍ୟ ପ୍ରଶ୍ନ
Indian Express ରିପୋର୍ଟରେ ଗୋଆର ଭୋଟର ତାଲିକା ସମ୍ପର୍କିତ ଏକ software ସମସ୍ୟା ଯୋଗୁଁ ୯୭ ଜଣ ଯୋଗ୍ୟ ଭୋଟରଙ୍କ ନାମ ଅନ୍ତିମ ତାଲିକାରେ ସାମିଲ ହୋଇପାରିନଥିବା ଘଟଣାକୁ ମଧ୍ୟ ଉଲ୍ଲେଖ କରାଯାଇଛି।
ଏହାପରେ ବିରୋଧୀଙ୍କ ପଦକ୍ଷେପ
ଏହି ରିପୋର୍ଟ ପ୍ରକାଶ ପରେ ବିରୋଧୀ ଦଳଗୁଡ଼ିକ CEC ଜ୍ଞାନେଶ କୁମାରଙ୍କୁ ପଦରୁ ହଟାଇବା ପାଇଁ ସଂସଦରେ ମୋସନ୍ ଆଣିବାକୁ ପ୍ରସ୍ତୁତ ହେଉଥିବା Indian Express ରିପୋର୍ଟ କରିଛି। କଂଗ୍ରେସ ସୂତ୍ର ଅନୁସାରେ, ଆଇନ ବିଶେଷଜ୍ଞଙ୍କ ସହ ମୋସନ୍ର ଡ୍ରାଫ୍ଟ ପ୍ରସ୍ତୁତ ହେଉଛି ଏବଂ ଉଭୟ ସଦନରେ ନୋଟିସ୍ ଦେବା ଯୋଜନା ରହିଛି।
ଏହା ପୂର୍ବରୁ ମଧ୍ୟ ଚଳିତ ବର୍ଷ ମାର୍ଚ୍ଚରେ ବିରୋଧୀ ସାଂସଦମାନେ CECଙ୍କୁ ହଟାଇବା ପାଇଁ ମୋସନ୍ ଦେଇଥିଲେ। Indian Express ଅନୁସାରେ, ଲୋକସଭା ଓ ରାଜ୍ୟସଭାରେ ଦିଆଯାଇଥିବା ପୂର୍ବ ନୋଟିସ୍ଗୁଡ଼ିକରେ SIR ଏବଂ ନିର୍ବାଚନ ପ୍ରକ୍ରିୟା ସମ୍ପର୍କିତ ଅଭିଯୋଗ ରହିଥିଲା।
ତେବେ ନିର୍ବାଚନ କମିଶନର ପକ୍ଷ କଣ?
ଏହି ବିବାଦ ଉପରେ ECI ପକ୍ଷରୁ ଭିନ୍ନ ମତ ରହିଛି। ନିର୍ବାଚନ କମିଶନ ସୂତ୍ର କହିଛନ୍ତି ଯେ SIR ସମେତ କମିଶନର ସମସ୍ତ ନିଷ୍ପତ୍ତି ତିନିଜଣ କମିଶନରଙ୍କ ଅନୁମୋଦନରେ ନିଆଯାଇଛି। ଆଭ୍ୟନ୍ତରୀଣ ଆଲୋଚନାରେ ମତଭେଦ ରହିବାକୁ ଏକ ସାଧାରଣ ଗଣତାନ୍ତ୍ରିକ ପ୍ରକ୍ରିୟା ବୋଲି ECI ପକ୍ଷରୁ କୁହାଯାଇଛି।
CECଙ୍କୁ ହଟାଇବାର ସାମ୍ବିଧାନିକ ପ୍ରକ୍ରିୟା
ମୁଖ୍ୟ ନିର୍ବାଚନ କମିଶନରଙ୍କୁ ସାଧାରଣ ପ୍ରଶାସନିକ ପ୍ରକ୍ରିୟାରେ ହଟାଯାଇପାରେ ନାହିଁ। ସମ୍ବିଧାନର ଅନୁଚ୍ଛେଦ ୩୨୪(୫) ଅନୁସାରେ CECଙ୍କୁ ସୁପ୍ରିମକୋର୍ଟ ବିଚାରପତିଙ୍କ ସମାନ ପ୍ରକ୍ରିୟାରେ ହଟାଯାଇପାରିବ। ଏଥିପାଇଁ ‘ପ୍ରମାଣିତ ଅସଦାଚରଣ କିମ୍ବା ଅକ୍ଷମତା’ ଭଳି ଆଧାର ଆବଶ୍ୟକ।
ଲୋକସଭାରେ ଏଭଳି ମୋସନ୍ ପାଇଁ ଅତି କମରେ ୧୦୦ ଜଣ ସାଂସଦ ଏବଂ ରାଜ୍ୟସଭାରେ ୫୦ ଜଣ ସାଂସଦଙ୍କ ସମର୍ଥନ ଆବଶ୍ୟକ। ମୋସନ୍ ଗ୍ରହଣ କରାଗଲେ ଅଭିଯୋଗର ତଦନ୍ତ ହେବ। ପରେ ଉଭୟ ସଦନରେ ଆବଶ୍ୟକ ଦୁଇ-ତୃତୀୟାଂଶ ଅଧିକାଂଶ ମିଳିଲେ ରାଷ୍ଟ୍ରପତି ହଟାଇବା ଆଦେଶ ଜାରି କରିପାରିବେ।
ଏବେ ବଡ଼ ପ୍ରଶ୍ନ, ନିର୍ବାଚନ କମିଶନ ଭିତରେ ଉଠିଥିବା ଆପତ୍ତି ଗୁଡ଼ିକ କିପରି ସମାଧାନ ହେବ?
ଗୋଟିଏ ପଟେ Indian Expressର ରିପୋର୍ଟରେ ଦୁଇ ନିର୍ବାଚନ କମିଶନରଙ୍କ ଲିଖିତ ଆପତ୍ତିର ଦାବି ରହିଛି। ଅନ୍ୟପଟେ ECI ପକ୍ଷରୁ ସମସ୍ତ ନିଷ୍ପତ୍ତି ନିୟମ ଅନୁସାରେ ଏବଂ ସମ୍ମତିରେ ନିଆଯାଇଥିବା କୁହାଯାଇଛି।
ତେଣୁ ଏହି ବିବାଦରେ ପ୍ରକାଶିତ ଅଭିଯୋଗ, ନିର୍ବାଚନ କମିଶନର ପ୍ରତିକ୍ରିୟା ଏବଂ ଆଗାମୀ ସଂସଦୀୟ ପ୍ରକ୍ରିୟା ତିନୋଟି ଦିଗ ଉପରେ ନଜର ରହିବ।
